Proyecto Scol Multilingual

Encuesta

Bo ta haya cu Aruba, Boneiro y Corsou mester tin un solo ortografia (manera di skirbi) pa Papiamento?

 

12 Aña di Oficialisacion di Papiamento

 Publica: 21 di mei 2015100818

Awe ta recorda cu 12 aña pasa Papiamento a bira idioma oficial di Aruba. Dia 21 di mei 2003, Parlamento di Aruba a aproba e ley di idioma oficial.

Esaki ta encera cu pa prome biaha den historia di Aruba, Papiamento y Hulandes a bira idioma oficial. Prome cu esey ningun di nan dos no tabata oficial na Aruba. Na Hulanda mes Hulandes a bira oficial na 1995. Na Corsou cu Boneiro Papiamento a bira oficial 4 aña despues, esta na 2007.

Den e 12 añanan aki a haci hopi trabou respecto Papiamento tanto como materia den enseñansa como e idioma nacional. Aki ta sigui un relato breve tocante esaki.

 

Papiamento y Enseñansa

Despues di a ofrece varios estudio di Papiamento Grado Tres, na augustus 2002 a cuminsa cu un estudio di Papiamento Grado Dos na Instituto Pedagogico Arubano (IPA). Aki varios persona a haya formacion como docente di Papiamento.

Despues cu e grupo aki a caba cu exito a sigui un estudio di Bachelor Papiamento. Actualmente tin un grupo di docente di Papiamento a caba Master in Education, Language and Literature of Papiamento na University of Curacao cu a inicia na september 2013.

Na augustus 2003, Papiamento a drenta enseñansa secundario EPB, MAVO, HAVO klas 1-2-3, VWO klas 1-2-3 y enseñansa avansa profesional EPI, IPA. Papiamento como materia ta sosteni principalmente pa e metodo didactico “Cristal”.

E siguiente aña escolar nobo 2015-2016, Papiamento lo sigui como materia den HAVO y VWO klas 4 y consecuentemente te final pa bira un materia di examen.

 

Proyecto Scol Multilingual

Otro desaroyo den Enseñansa rond idioma Papiamento ta e Proyecto Scol Multilingual (PSML) cu a keda implementa na augustus 2008 na scol preparatorio piloto. Actualmente Papiamento tanto como lenga di instruccion como materia hunto cu Hulandes, Ingles y Spaño ta den klas 3 di enseñansa basico den 2 scol basico piloto.

 

Material di Referencia

Na 2009, pa prome biaha, a publica un lista amplio di palabra: “Vocabulario Ortografico di Papiamento”, miho conoci como e Buki Blauw. E buki aki ta representa e ortografia di Papiamento di Aruba. Actualmente, ainda Papiamento ta sperando legislacion di su ortografia. Cu e lista di palabra aki e uzadonan di Papiamento skirbi tin un instrumento practico den nan man pa skirbi Papiamento miho.

Na 2010 a publica e prome edicion di “Manual di Gramatica di Papiamento - Morfologia”. Morfologia ta e estudio cu ta ocupa su mes cu structura, formacion, funcion y nificacion di palabra di un lenga, den e caso aki: Papiamento. E buki aki ta trata principalmente categoria di palabra.

Na e mesun aña a inicia un otro trabou di investigacion linguistico y desaroyo di e material: “Manual di Gramatica di Papiamento - Sintaxis”. Sintaxis ta studia con ta ordena, coordina y subordina e palabranan y e relacionnan cu e palabranan aki tin den un frase. E buki aki ta trata principalmente frase y su structura. Tin planea pa publica e buki aki na final di 2015.

E intencion di ambos manual ta pa nos comunidad adkiri conocemento basico di gramatica di Papiamento. Banda di esaki tambe a traduci diferente buki tanto didactico como buki di lesa na Papiamento.

Papiamento tin su propio vocabulario, gramatica y ortografia. Nos idioma ta rico na proverbio, dicho y expresion. Esaki ta haci tambe cu tin hopi mas pa investiga tanto riba e area linguistico como literatura. Cada un di nos ta responsabel pa tene Papiamento na un nivel eleva.

“Nos idioma ta den bo man. Papiamento, cuid’e!”.

 

Info / Contact

DEA | Proyecto Idioma