Proyecto Scol Multilingual

Encuesta

Bo ta haya cu Aruba, Boneiro y Corsou mester tin un solo ortografia (manera di skirbi) pa Papiamento?

 

Dia Internacional di Idioma Materno

 Publica: 21 di februari 2016100818

Dia 21 di februari di tur aña ta Dia Internacional di Lenga Materno. Segun proclamacion di UNESCO. Departamento di Cultura Aruba (DCA) ta organisa e proyecto di "Arte di Palabra" (ADP) cu ta un competencia conta cuenta y di storia cortico, poesia pa hoben escolar.

ADP Interinsular ta un competencia entre Corsou, Boneiro y Aruba. Esaki ta un competencia pa alumnonan di scolnan avansa cu DCA ta organisa for di 2009 y cu aña pa aña e interes bou di nos hobennan ta creciendo pa participa.

 

Meta

Meta di e proyecto aki ta pa duna hoben oportunidad pa demostra nan creatividad literario; pa promove lesamento y skirbimento den nos idioma Papiamento; pa stimula publicacion di arte literario den Papiamento. Y tambe pa e hobennan di A.B.C. tin un intercambio den nan cultura.

Cu e proyecto aki DCA ta traha hunto cu Grupo di Corectornan di Papiamento y Fundacion Lanta Papiamento. Pa medio di e competencia di Arte di Palabra ta stimula e hobennan pa medio di nan poesia of cuenta cortico haci bon uzo di nos idioma Papiamento y enrikece nan conocemento di nos idioma.

 

Departamento di Cultura Aruba (DCA)

Ora di saca informacionnan cultural di tur loke ta publicacion DCA ta haci su esfuerso pa percura pa tur ta den bon idioma Papiamento. Publicacionnan manera “Nos Isla”, foyectonan di nos Simbolonan Nacional, manera nos escudo, himno y bandera, Celebracion di San Juan, Dera Gay, Proyecto di Expedicion Rescate y esun di e aña aki cu lo presenta Expedicion Rescate Naturalesa (ERN). ERN ta trece informacionnan valioso di nos flora y fauna. Tur esaki den un exposicion interesante na Parke Nacional Arikok pa publico en general y nos muchanan di scol.

Ora di duna relato den forma oficial DCA ta aplica e Vocabulario Ortografico di Papiamento di 2009.

Den sentido general ta considera idioma, como e medio unificador di mas importante di un cultura. Idioma ta carga tur pensamento y experiencia humano, cultura y identidad. Idioma ta transferi cultura.

Mirando esaki DCA tin idioma Papiamento como un punto importante den su educacion cultural. Como cu ortografia tambe ta un simbolo sumamente importante, como muestra di un propio identidad. Mester mustra cu e oficialisacion por crea aprecio y stimula nos pa, cu orguyo y amor, siña nos hendenan conoce e historia di nos idioma materno bon y promove e uzo corecto di papi’e y skirbie (papia- y skirbimento).

Durante e desaroyo di nos idioma materno Papiamento y como Departamento di Cultura Aruba bou auspicio di Ministerio di Cultura ta keda enfoca pa su retonan pa educa, promove, cuida y hacie mas conoci e bon uzo di nos Papiamento pa generacionnan cu ta bini.

 

Info / Contact

DCA | Departamento di Cultura Aruba