17 autor di Aruba ta publica investigacion

Oranjestad – Dia 22 di november 2011 Universidad di Aruba tabata sede di e entrega di e bukinan “Iguana’s Newfound Voices” y “Anansi’s Defiant Webs” na e autornan cu a publica nan investigacion.

Un total di 80 autor for di diferente pais den Caribe a haci investigacion tocante idioma, literatura, cultura y sociedad y a publica nan.

A forma dos volumen: “Iguana’s Newfound Voices”, cu ta solamente di Aruba, Boneiro y Corsou, y “Anansi’s Defiant Webs”, cu ta di e paisnan Jamaica, St. Croix, Trinidad, Costa Rica, Merca, Colombia, Puerto Rico y Guyana. 

E volumennan aki ta edita pa prof. dr. Nicholas Faraclas, prof. dr. Ronald Severing, drs. Christa Weijer y dr. Elisabeth Echtveld.

E aña aki e volumen di e islanan ABC “Iguana’s Newfound Voices” ta mas diki cu esun di e otro paisnan. Ademas e biaha aki tin un total di 17 autor di Aruba, mucho mas hopi cu e añanan anterior. E autornan ta entre otro di Instituto Pedagogico Arubano (IPA), Universidad di Aruba (UA)y Departamento di Enseñansa Aruba (DEA).

E articulo “Un investigacion linguistico di uzo di Papiamento den prensa na Aruba” di sra. Audrey Tromp-Wouters hunto cu sr. Etley Lasten a keda categorisa bou ”Divergence and Convergence in Language”. E articulo aki ta un resumen di un investigacion cu ta duna indicacion riba e uzo di Papiamento den prensa skirbi y prensa papia. A investiga e siguiente aspectonan: sintaxis, lexico, plural, preposicion, articulo y conhuncion. E articulo ta duna un bista general di e motibonan con prensa ta uza e idioma Papiamento y tambe ta duna recomendacion na gobierno, prensa y comunidad en general pa mehora e situacion.

E articulo “Papiamento y pensamento critico na Aruba” di sra. Maureen Molina-Luidens a keda categorisa bou “Divergence and Convergence in language planning and policy”. E articulo ta un parti chikito di un investigacion tocante con proceso di pensamento y idioma ta conecta cu otro y ta traha hunto, pa despues yega na pensamento critico. A conecta e parti aki cu loke Aruba su enseñansa ta haciendo riba desaroyo di e area pensamento critico y e area di idioma Papiamento, cuminsando for di enseñansa preparatorio te cu enseñansa universitario y despues di esaki.

Tur dos articulo linguistico ta interesante pa lesa y pa haya sa mas di diferente investigacion haci relaciona cu idioma Papiamento.

    
E autornan di DEA ta sra. drs. Audrey Tromp-Wouters y sra. Maureen Molina-Luidens. 
Tur dos ta forma parti di e ekipo dinamico di Proyecto Idioma den Enseñansa.