25 Aña di Status Aparte, 25 Aña di Literatura Arubano

Oranjestad – Diaranson dia 29 di februari 2012, Instituto Pedagogico Arubano (IPA) y su Centro di Investigacion y Desaroyo di Enseñansa (CIDE) ta tene su Charla Comunitario (Community Talk) titula: “25 Aña di Status Aparte, 25 Aña di Literatura Arubano”.

E encuentro aki ta di 7.30 pa 9.30 di anochi y lo tuma luga na Café Nita situa na IPA (Isaac Wagemakerstraat 11, San Nicolas). 

Henter e comunidad di Aruba ta keda cordialmente invita pa asisti na e charla comunitario aki cu ta completamente gratis.

Durante e encuentro aki ta bay tin un presentacion di Prof. dr Wim Rutgers, profesor y investigado riba tereno di ciencia y historia di literatura Caribe Hulandes. Tambe lo tin un presentacion di drs. Joe Fortin, investigado Arubano riba tereno di idioma y cultura di Latino America y Caribe.

E oradonan lo trata diferente aspecto di literatura Arubano manera su nificacion y representacion den e periodo despues di Status Aparte. Tambe lo enfoca specificamente riba e obranan di algun autor Arubano manera di entre otro Jossy Tromp, Ernesto Rosenstand, Hubert Booi y Frank Williams. Durante e presentacionnan lo tin oportunidad amplio pa haci pregunta, hiba discusion y trece sugerencianan pa dilanti.  

Prof. dr Wim Rutgers tin un doctorado di Universidad di Utrecht den ciencia y historia di literatura Hulandes cu enfoke riba idioma di Papiamento/u. Tambe e ta fungi como docente na entre otro IPA, Universidad di Aruba y Universidad di Korsou unda e tin su ‘leerstoel’.

Drs. Joe Fortin ta un graduado di Universidad di Leiden cu un Master den “Languages and Culture of Latin America” cu enfoke riba literatura ‘neo baroque y naratologia’ di Caribe Spaño. Actualmente e ta haciendo un investigacion pa su Ph.D tocante literatura Arubano.