7 buki di literatura hubenil na Papiamento
Oranjestad – Recientemente Instituto Pedagogico Arubano (IPA) a publica y presenta shete novela hubenil na Papiamento pa Ciclo Basico di nos scolnan secundario. Entretanto a entrega e bukinan aki na tur scol secundario na Aruba y tambe na Imeldahof, Cas pa Hubentud, Biblioteca Nacional, YMCA y na e biblioteca di KIA. E publicacionnan aki a keda realisa cu financiamento di Fondo di Desaroyo Aruba (FDA).
Ta importante pa menciona, cu pa e shete bukinan aki a haya cooperacion colegial di Fundashon Planifikashon di Idioma (FPI) di Corsou. E bukinan aki tabata cla caba y loke nos mester a haci aki na Aruba tabata adapta e ortografia. E redactornan ta Swinda Schwengle y Selvia Ellis-Lumenier. Lider di e proyecto ta Joyce Pereira.
Ta trata di e siguiente bukinan:
E biahenan di Miguel Vicente Pata Cayente di Orlando Araujo, Catalina Bocachica di Luis Darío Bernal Pinilla, Caimin su secreto di Diana Lebacs, Paco, e macaco baldadi / Shon Calu, e pushi lerdo di Ligia van Meeteren-Henriquez, Horcan y Mayra di Sonia Garmers, No yora canto di lama di Richard Piternella y E cas patras di Anne Frank.
Publicacion di buki ta un trabou intensivo y hopi costoso y p’esey mes IPA ta contento cu e proyecto di publicacion aki por a keda realisa. E proyecto aki ta parti di e proyecto grandi conoci como ”(Na)scholingsprogramma’s op het gebied van Papiamento en onderwijs in het Papiamento”, financia pa FDA. Otro parti di e proyecto aki ta Recapacitacion Papiamento pa maestro di tur tipo di enseñansa, e estudio Bachelor Papiamento, planificacion di Master Papiamento y e ‘Onderwijswerkplaats (OWP)” di IPA. E OWP a keda cla y e otro proyectonan ta den ehecucion y no a finalisa ainda.
Pa loke ta e proyecto di publicacion, tin hopi buki mas na caminda. E bukinan aki ta destina pa scol preparatorio, basico y secundario. Como cu mayoria ta original, e proceso di skirbi y di redaccion a tuma hopi tempo, sigur na Aruba caminda e autornan y redactornan tin cu haci esaki despues di nan trabou. E bukinan aki ta cla awor den forma di manuscrito redacta y awor e proceso di lay-out, ilustracion y imprenta ta bay cuminsa.
IPA ta spera cu e bukinan aki ta cay na agrado di tur alumno y docente y di tur otro lesado.
- February 2023
- January 2023
- March 2022
- February 2022
- February 2021
- October 2020
- December 2019
- September 2019
- August 2019
- May 2019
- December 2018
- November 2018
- September 2018
- August 2018
- July 2018
- June 2018
- May 2018
- January 2018
- September 2017
- April 2017
- March 2016
- February 2016
- May 2015
- February 2015
- June 2014
- May 2014
- February 2014
- April 2013
- March 2013
- February 2013
- March 2012
- February 2012
- December 2011
- November 2011
- August 2011
- July 2011
- February 2011
- August 2010
- July 2010
- May 2010
- April 2010
- March 2010
- February 2010
- January 2010
- November 2009
- October 2009
