Busca Palabra

Encuesta

Ki ora bo ta cuminsa bisa otro “bon tardi”?

View Results

Loading ... Loading ...

Proyecto Scol Multilingual

Anochi di Contamento di Cuenta

Publica: 08/04/2013

 1

Oranjestad – Fundacion Lanta Papiamento (FLP) hunto cu Comision Aña di Papiamento lo ofrece un anochi ameno cu un programa di contamento di cuenta. E anochi aki ta forma parti di un ciclo cu FLP ta presentando na diferente Centro di Bario rond di Aruba y cu repetidamente a haya un acogida yen di entusiasmo.

Fundacion Lanta Papiamento (FLP) a lanta cuater aña pasa, na luna di mei 2009, cu e obhetivo fundamental pa conscientisa nos pueblo tocante e identidad y e balor di nos lenga Papiamento. Den su trayectoria cortico, pero consciente y dirigi riba e obhetivo ey, FLP a desplega un variedad di evento y actividad cultural cu ta abarca, entre otro, investigacion y informacion linguistico, acto di homenahe, concurso ortografico y charla linguistico y literario.

Recientemente, dia 21 di februari, FLP a organisa conhuntamente cu Biblioteca Nacional Aruba (BNA), como celebracion di Dia Internacional di Idioma Materno proclama pa UNESCO, un anochi cultural memorabel. Na e ocasion ey Pedro R. Velásquez a haci un reflexion critico tocante e subsistencia y e apreciacion di Papiamento na Aruba y Ramon Todd Dandaré a duna di conoce, den un enfoke historico y un presentacion interactivo, e tres textonan skirbi mas bieu di Papiamento te aworaki.

E publico numeroso cu a haci acto di presencia tabata sumamente participativo y a duna muestra di un gran interes pa e temanan trata. Y den otro sentido tambe publico a expresa se aprecio pa e esfuersonan y e gestionnan cu FLP ta realisando.

E siguiente actividad cultural cu FLP – hunto cu Comision Aña di Papiamento – lo ofrece e siman aki ta un anochi ameno cu un programa di contamento di cuenta. Na e ocasion aki e programa ta inclui diferente autor y contado di cuenta conoci y tambe algun sorpresa talentoso.

E anochi aki lo tin tambe entretenemento musical na encargo di nos conocido mandolinista Tino Ruiz.

Fundacion Lanta Papiamento ta invita pueblo di Aruba cordialmente pa acudi na e anochi cultural aki cu lo tuma luga na Club Don Bosco na Noord, diasabra dia 13 di april, for di 7.30 or y te 10.30 or.

Tambe FLP kier trece cortesmente bou di atencion di pueblo di Aruba cu – den cuadro di nos Aña di Papiamento – FLP tin un serie di actividad y evento cultural, di caracter tanto teoretico como practico, proyecta pa e aña aki, cu FLP lo anuncia na su debido tempo.

 

Contact

Departamento di Cultura Aruba

Scroll To Top