Busca Palabra

Encuesta

Ki ora bo ta cuminsa bisa otro “bon tardi”?

View Results

Loading ... Loading ...

Proyecto Scol Multilingual

Arte di Palabra 2013

Publica: 06/03/2013

 1

Publica: 6 di maart 2013

Oranjestad – Dia 5 di maart ultimo a tuma luga un conferencia di prensa na Biblioteca Nacional encuanto di Arte di Palabra, caminda diferente representante di e comision organisatorio a hiba palabra.

Esaki ta di prome lustro di Arte di Palabra, competencia literario na Papiamento, na Aruba organisa pa Grupo Corector Papiamento conhuntamente cu Departamento di Cultura Aruba, Departamento di Enseñansa Aruba y cu ayudo financiero di algun sponsor, manera ELMAR, UNOCA, Aruba Bank , Victoria Bottling, Balashi, SETAR, Banco di Caribe etc. E competencia aki ta pa tur alumno di enseñansa avansa y e alumnonan por competi riba tereno di poesia, cuenta/storia cortico y haiku.

Na Aruba competencia di Arte di Palabra lo tuma luga riba diasabra 16 di maart pa 10’or di mainta na Crystal Theater. Final di e competencia ABC ta tuma luga diasabra dia 23 di maart, caminda e ganadonan di Boneiro y Aruba tambe ta invita.

Meta

E metanan di Arte di Palabra ta pa:
1. Cultiva amor pa cultura di nos idioma Papiamento.
2.
Enrikese nos idioma cu creatividad di nos hubentud

Participacion

Ken por participa? Alumno di scol avansa por competi riba tereno di: 

Poesia
A. Poesia existente – alumno di klas 1 of 2
B. Poesia original, skirbi pa e alumno mes – alumno di klas 1 of 2
C. Poesia original, skirbi pa e alumno mes – alumno di klas 3-6 of 1,2 EPI

Cuenta/Storia cortico
D. Cuenta existente – alumno di klas 1 of 2
E. Cuenta original, skirbi pa e alumno mes – alumno di klas 1 of 2
F. Cuenta original, skirbi pa e alumno mes – alumno di klas 3-6 of 1,2 EPI

E hobennan por inscribi via scol (via nan docente di Papiamento) of  via e-mail artedipalabra@gmail.com no mas tarda cu 8 di maart proximo. Hunto cu e inscripcion nan mester manda nan obra tambe.

Luga y asistencia di publico

Na Aruba e competencia lo tuma luga riba 16 di maart pa 10or di mainta na Crystal Theater. Entrada na e actividadnan di Arte di Palabra ta gratis. Ta invita for di awor caba tur e alumnonan di e scolnan secundario pa bin apoya nan participantenan. Tur famia y otro amantenan di arte tambe semper ta bonbini.

Premio

Cada participante ta haya un certificado di participacion y un regalo. E ganadonan di cada categoria ta haya un premio masha special. For di e prome aña 2009 e ganadonan di e prome premio den cada categoria ta gana un biahe pa Corsou pa bay participa den e final di Arte di Palabra ABC.

Ganadonan di 2009 cu poesia original tabata Yakari Gabriel,  Marilis Becker y Jai Maraisa Gabriella. E ganadonan di storia cortico tabata Zaylon Panthophlet, Sharienda Maria, Litienne Lacle. 

Na aña 2010 e ganadonan cu nan poesia original tabata Kathy Farro, Laura Kock y Samantha Trinidad. E  ganadonan di storia original tabata Laura Kock, Thalia Higgens y Osvaldo Correa.

Na aña 2011 ya e hubentud di Aruba a haya fama na Corsou. Angele Stamper y Osvaldo Correa a gana cu nan poesia y storia original. Di dos luga den poesia a bay pa Kathleen Faro y di tres luga a bay pa Laura Kock. Laura a gana tambe di tres luga den e categoria di storia. Arlette Franken tawata na di dos luga cu su storia. 

Na 2012 e ganado di poesia existente tawata Mirzah Manga cu su declamacion di e poesia ‘Ami’ di Jhon Freddy Montoya. Ana Victoria Kock a sali ganado cu su poesia original ‘Libertad’ den categoria di klas 1 y 2 . Den categoria di klasnan mas grandi a saca Emanuel Rosel na prome luga cu su poesia ‘Prisonero di palabra sin bisa’. Na di dos luga a saca Eleen Gillian Rasmijn cu su poesia ‘Amor y Balor’. Ganado di cuenta original klas 1 y 2 a keda den persona di Osvaldo Correa cu su storia ‘Regla Cuenta’. Osvaldo pa di dos aña consecutivo a sali ganado di su categoria den e competencia ABC na Corsou. Y finalmente Paola Thijsen a bira ganado di categoria di klasnan mas grandi cu su storia original ‘Humano Imperfecto’.

Hurado

Tur aña ta acerca diferente persona di comunidad pa forma parti di hurado. E huradonan ta haya e criterianan y un guia di loke ta spera di nan.

Prensa

Prensa tambe ta keda invita for di awor pa bin presencia e competencia aki. Na Corsou for di aña 2000 Radio Curom ( Z-86 of Rock 88) ta transmiti e competencia final na Corsou bibo y directo.

Homenahe na baluartenan di Papiamento: tapushi literario

Na Corsou  for di aña 2000 ta dedica tur aña atencion na algun persona cu a destaca riba tereno di Papiamento. Meta di esaki ta pa conscientisa e hobennan di e hecho cu nos mester siña di e grandinan cu a indica e caminda. For di aña 2002 e baluartenan ta ricibi un Tapushi literario y un certificado di merito. For di e prome aña cu Aruba ta participando na Arte di Palabra ABC, tawata tin un baluarte di Aruba tambe, banda di e baluartenan di Corsou y Boneiro:

Na 2009: Sra. Desiree Correa
Na 2010: Sra. Munye Oduber
Na 2011: Grupo di Corector Papiamento
Na 2012: Sra. Olga Buckley

Competensia di haiku Elis Juliana

Na Corsou a amplia e competencia cu e genero di haiku for di 2008.  A dedica e competencia aki na Elis Juliana na ocacion di su di 80 aniversario.

Banda di e categorianan di hoben cu ta bishita scol, tur otro persona por participa.

Na Aruba nos ta saca nos mesun ganadonan di haiku y tambe nos ta manda tur e haikunan pa e competencia na Corsou. Na Corsou, hurado, bou di presidencia di Sr. Elis Juliana mes ta saca nuebe haiku ganado.

Contact

Departamento di Cultura Aruba

Scroll To Top