Charla comunitario “Idioma, Cultura y Pensamento Critico”

Oranjestad – Instituto Pedagogico Arubano (IPA) y su Centro di Investigacion y Desaroyo di Enseñansa (CIDE) ta invita pueblo di Aruba pa e Charla Comunitario (Community Talk) titula: “Idioma, Cultura y Pensamento Critico”.

Durante e encuentro aki lo bay tin un presentacion di Maureen Molina-Luidens, docente di Papiamento y (co)-autor di varios publicacion linguistico tocante Papiamento. Tambe lo tin un presentacion di Rosabelle Illes, cu ta artista riba tereno di arte di palabra y autor di varios publicacion.

E oradornan lo trata diferente aspecto relaciona cu idioma y pensamento critico y e rol di cultura, enseñansa y medionan social nobo riba formacion di idea y desaroyo di idioma. Durante e presentacionnan lo tin oportunidad amplio pa haci pregunta, hiba discusion y trece sugerencia padilanti.

Maureen Molina-Luidens Ta trahando actualmente na Departamento di Enseñansa Aruba y a forma parti di diferente proyecto di promocion di Papiamento. Recientemente el a publica un articulo tocante “Papiamento y pensamento critico na Aruba” den e buki “Iguana’s Newfound Voices”.

Rosabelle Illes Tin un Bachelor den psicologia y un minor den Literatura Ingles di Webster University Leiden. Actualmente e ta finalisando su Master den psicologia social y organisatorio na Universidad di Leiden. 

Fecha: Diaranson, 15 di februari 2012 
Luga: Café Nita, IPA (Isaac Wagemakerstraat 11, San Nicolas) 
Ora: 7.30 pm – 9.30 pm 
Entrada: Gratis