Charla di Keisha Wiel na Universidad di Aruba

Oranjestad – Diahuebs dia 30 di juni, anochi den sala di conferencia di Universidad di Aruba na L.G.Smith Boulevard, Keisha Wiel a tene su charla interesante: Papiamento: The Language that Identified the People of Aruba and Curaçao.

Na aña 2010 Keisha a gradua na Universidad di Central Florida, na Orlando, Florida,  pa su Master den Antropologia. Su tesis final ta trata “Perceptions on the social status of Papiamentu in contrast to its official significance in Aruba and Curaçao”. 

Despues di a presenta exitosamente tanto na e conferencia di Caribbean Studies Association (CSA) na Corsou (di 30 di mei pa 4 di juni ultimo), como na e conferencia di International Society of Language Studies (ISLS) na Aruba (23-25 di juni ultimo), Center of Research and Development (CRD) di Universidad di Aruba a invita Keisha pa e presenta algun aspecto di su tesis na pueblo di Aruba.

Pa un audiencia hopi interesa Keisha a tene su charla, den cua e ta splica con den su investigacion antropologico a sali na cla, cu na Aruba y Corsou ta Papiamento ta e idioma cu ta determina identidad di e Arubiano y e Yiu di Corsou. 

El a duna diferente ehempel di e muestra di identidad aki. Un ehempel resaltante ta e lema Dushi yiu cu a bira masha popular na nos islanan y hasta den exterior. Hopi hende, specialmente hoben, ta carg’e orguyosamente riba nan t-shirt y ta pone sticker riba nan auto, tas etc.

Otro ehempel ta, cu hopi yiu di inmigrante, specialmente esnan di e di dos generacion bay ariba, ta considera Papiamento nan idioma.

Despues di e presentacion tabatin diferente pregunta cu Keisha a contesta cu dato di su investigacion. E discusion tabata hopi anima.

CRD ta desea Keisha, cu ta di tata Curasoleño y mama Arubiano, pero naci y lanta na Estados Unidos, papiando un bon Papiamento, tur clase di exito den su carera profesional na e pais ey.