DVD di documentario “Papiamento, Nos Idioma”

Oranjestad – Na ocasion di 11 aña di oficialisacion di Papiamento, Departamento di Enseñansa Aruba (DEA) ta orguyoso di por ofrece e documentario “Papiamento, Nos Idioma” riba DVD na tur nos scolnan. Sperando cu e documentario aki por contribui na engrandece conocemento y aprecio pa nos idioma Papiamento.

Meta di e documentario ta pa eleva e aprecio pa Papiamento door di duna informacion y presenta echo relaciona cu nos idioma. Pa logra esaki a combersa cu un gran cantidad di experto cu a duna tempo pa comparti nan conocemento y experiencia.

Investigacion y redaccion tabata den man di Proyecto Idioma di Departamento di Enseñansa Aruba, bou guia di Rebecca Roos kende a percura pa e script. Produccion tabata na encargo di ECA.

E produccion, cu tin un duracion di 70 minuut, a forma parti di e campaña di promocion “Nos idioma ta den bo man. Papiamento, cuid’e!”, un proyecto financia pa Fondo Desaroyo Aruba (FDA) y cu tabata na encargo di Departamento di Enseñansa.

Intencion di e documentario ta pa nos tur, adulto y hoben, haya sa mas tocante Papiamento. E documentario lo lanta nos curiosidad pa nos sigui explora y investiga nos idioma.