Exitoso actividad ‘Ban papia di Papiamento’

Oranjestad – Relaciona cu Dia Internacional di Lenga Materno, Grupo di Corector di Papiamento conhuntamente cu Fundacion Lanta Papiamento cu sosten di Departamento di Cultura di Aruba a organisa un anochi dedica na Papiamento dia 20 di februari ultimo na Club Don Bosco na Noord. Durante di e anochi aki por a conta cu participacion di persona di diferente gremio na Aruba, di ama di cas te maestro di scol, di studiante te linguistico experiencia, di hoben te pensionado; hasta algun parlamentario a participa.

Despues di a introduci Grupo di Corector di Papiamento y Fundacion Lanta Papiamento a ranca sali cu e prome charla. E charla titula “Nos enseñansa ta di nos?” tawata na encargo di Sr. Ramon Todd Dandaré, kende a demostra cu cifra cu e alumno Arubiano y cu ne e pueblo Arubiano, ta esun cu mas ta sufri den e sistema di enseñansa actual. 

Despues a sigui un teatro foro, na encargo di Sra. Sacha Geerman cu ayudo di Sr. Ricky Hoek, durante cual a ilustra na un manera chistoso, pero toch bon cla diferente pensamento den nos comunidad tocante Papiamento. 

Seguidamente Sra. Diana Lebacs a presenta su charla “Papiamento a bay scol”, presentando un bista di 34 aña di Papiamento como idioma di instruccion den enseñansa primario na Corsou (prome den enseñansa special, sigui pa enseñansa preparatorio y awor den enseñansa basico). Despues di tur dos charla y tambe despues di e teatro foro tawata tin oportunidad pa haci pregunta y/of duna comentario, loke a haci cu e publico presente tambe a participa acitivamente.

Tambe Grupo di Corector di Papiamento a presenta un buki di poesia skirbi pa Sra. Carmen Lampe, conoci tambe como juffrouw Carmen, kende a pesar di ta skirbi pa hopi tempo caba, nunca no tawatin un publicacion den forma di buki. Di e manera aki Grupo di Corector di Papiamento kier a reconoce tur esnan cu ta skirbi, pero nunca no a publica y tambe sigui cu e ‘tradicion’ di saca un buki durante nan actividad. Tur persona presente a ricibi un ehemplar di e buki “Mi Papiamento”, despues cu a haci entrega di e buki na parlamentario, representante di mandatario, e dos oradornan y director di diferente departamento presente.

E culminacion di e anochi tawata un tayer, durante cua a parti e publico den grupo y asina a bay delibera riba diferente pregunta y ponencia tocante Papiamento. Despues a sigui un brindis pa celebra Dia Internacional di Idioma Materno y elogia Papiamento, cu acompañamento musical di Sr. Tino Ruiz y Sr. Etty Toppenberg, cu a entretene e publico den un forma unico.

Grupo di Corector di Papiamento y Fundacion Lanta Papiamento kier a gradici tur participante, Gobierno di Aruba, cu a colabora pa medio di  Departamento di Cultura di Aruba y tambe tur otro instancia y persona  cu a yuda haci e actividad aki un exito!

Siguiente actividad

Mester bisa cu door cu e tempo tawata cortico no ta tur grupo a haña oportunidad di presenta nan contesta y/of opinion. Ta p’esey mes Fundacion Lanta Papiamento y Grupo di Corector di Papiamento, cu sosten di Departamento di Cultura di Aruba, un biaha mas kier a invita tur e participantenan di e Anochi di Discusion ‘Ban papia di Papiamento’, y tur otro persona interesa, pa un continuacion di “Ban papia di Papiamento” durante cua lo presenta e contesta- y opinionnan di tur e gruponan. Esaki lo tuma luga diahuebs dia 4 di maart proximo na Departamento di Cultura (banda di Misa San Francisco na Playa) di 8 or te 10 or di anochi. 

Durante e anochi aki lo presenta  e contestanan y opinionnan di e gruponan; lo haci un compilacion pa esaki. Tambe lo tin oportunidad pa esnan cu kier amplia tocante algun di e puntonan cu a presenta, haci esey libremente. Ta spera participacion di un y tur pa nos logra yega na resolucion di ‘Ban papia di Papiamento’ pa presenta nan pronto na e mandatarionan y publico en general.