Busca Palabra

Encuesta

Ki ora bo ta cuminsa bisa otro “bon tardi”?

View Results

Loading ... Loading ...

Proyecto Scol Multilingual

Fundacion Lanta Papiamento

Publica: 05/06/2014

 100818

Oranjestad – Fundacion Lanta Papiamento (FLP) tin como meta primordial di conscientisa pueblo di Aruba tocante Papiamento cu ta idioma oficial y idioma nacional di Aruba, y idioma materno di e gran mayoria di e poblacion di Aruba. FLP ta realisa un variedad di actividad educativo y cultural pa yega na su meta.

Por ehempel recientemente FLP a ofrece pa di dos biaha un les publico di Papiamento. FLP ta organisa entre otro charla tocante topico linguistico y literario, evento literario, cultural y educativo, concurso di ortografia. E proximo actividad riba agenda di FLP ta un conferencia linguistico internacional. Directiva di FLP tin ya caba un aña y mey ta trahando duro riba organisacion di e conferencia aki.


Directiva

Actualmente directiva di FLP ta consisti di Rensley Mathilda (presidente), Candelaria Dirks (vice presidente), Etlien Croes (secretario), Gilbert Damian (di dos secretario), Josephina Maduro (tesorero), Robert Nieuw (di dos tesorero) y e miembronan Bertha Wolff, Julie Thodé y Glenda Reiziger.

Fundacion Lanta Papiamento ya tin 5 aña ta boga pa cambio di acercamento, posicion y maneho relaciona cu Papiamento y pa mehoracion y desaroyo di e status di idioma Papiamento, tanto localmente como internacionalmente.


Plataforma Union di Papiamento

Pa yega na e meta ta traha riba cooperacion y intercambio di informacion cu otro organisacion den Reino cu tin un meta similar. FLP tin partner manera Fundashon Akademia Papiamentu di Corsou, Fundashon Alsa Papiamentu y Fundacion Dushi Papiamentu di Boneiro y Fundashon SPLIKA di Hulanda. Hunto cu e fundacionnan aki a constitui Plataforma Union di Papiamento. Trahando hunto cu e organisacionnan aki FLP ta trata na crece, siña mas, logra mas y yega na un publico grandi.

FLP ta traha hunto cu diferente organisacion local tambe pa asina amplia cada bes su red social y busca oportunidad pa por sigui traha di un manera dinamico. FLP ta duna informacion tocante su actividadnan entre otro tambe pa medio di su Community Page riba Facebook.


Conferencia Internacional di Lenga di Caribe na Aruba

Pa prepara e Conferencia Internacional di Lenga di Caribe cu ta tuma luga di dia 5 pa dia 8 di augustus proximo FLP a forma un Comision Organisado Local (COL) hunto cu Biblioteca Nacional Aruba, Instituto Pedagogico Arubano (IPA), Departamento di Cultura Aruba, Departamento di Enseñansa Aruba (DEA), Universidad di Aruba (UA), Grupo di Corector di Papiamento y Fundacion Bon Nochi Drumi Dushi.

E COL aki ta traha estrechamente cu e organisadonan principal di e conferencia cu ta Society for Caribbean Linguistics (SCL), Society for Pidgin and Creole Linguistics (SPCL) y Associação de Crioulos de Base Lexical Portuguesa e Espanhola (ACBLPE).

Na e conferencia aki un publico grandi ta haya hopi informacion cientifico di e idiomanan concerni, incluso di Papiamento, y por bay den discusion, haci pregunta y papia cu otro riba diferente aspecto interesante di e idiomanan di Caribe.

FLP cortesmente kier invita tur persona interesa pa participa na e Conferencia Linguistico Internacional aki. [mas informacion]

Desaroyo di un bon maneho y planificacion di idioma ta na bienestar di tur sector den comunidad, di gobierno y, en especial, di enseñansa.

 

Scroll To Top