Papiamentistica hayando acogida

Oranjestad – Poco-poco e programa di wega “Papiamentistica” ta hayando acogida cerca e pueblo di Aruba. “Papiamentistica” ta un wega educativo y alabes recreativo cu ta laga nos haya sa mas tocante nos idioma Papiamento. Aki tur televidente por participa hunto cu e teamnan di e medionan di comunicacion. “Papiamentistica” ta organisa den cuadro di e campaña di promocion di Papiamento “Nos idioma ta den bo man. Papiamento, cuid’e!”. E campaña aki ta pa aporta na cuido di Papiamento.

Nos ta gradici pueblo di Aruba pa e acogida enorme cu Papiamentistica ta hayando. Danki pa tur reaccion positivo y tambe pa e sugerencianan tanto riba facebook di Papiamento, via website papiamento.aw como tambe via telefon.

Haya sa mas tocante Papiamento door di bishita e website papiamento.aw. Riba e website por haya articulo relaciona cu e importancia di Papiamento. E website papiamento.aw ta contene masha hopi informacion tocante idioma Papiamento y tur informacion ta informacion exacto, berdadero y confiabel. Un otro manera cu tambe por haya informacion tocante regla tanto di ortografia como di gramatica di Papiamento, ta den e buki di telefon di Setar 2010 riba pagina 18 den e seccion “Community Pages”.

Pa loke ta e programa “Papiamentistica”, awe nochi pa 8.30 na ATV, e team di Radio Kelkboom y e team di ATV lo enfrenta otro cara cara. Pa 9.00 di anochi na Telearuba, e team di Amigoe lo bataya contra e team di 24ora.com. Sin duda e batayanan lo ta fuerte. Riba e potret nos tin e team di ATV canal 15.