Programa di wega ‘Papiamentistica’ pronto na television

 Oranjestad – Na Aruba, Papiamento ta e idioma di comunicacion mas uza, tanto riba caya como den medionan di comunicacion. Pa mas o menos 70% di nos poblacion, Papiamento ta idioma materno. Por defini idioma materno basa riba diferente aspecto. Basa riba origen, por bisa cu idioma materno ta e idioma cu bo a siña prome.

Basa riba identificacion personal, por bisa cu idioma materno ta e idioma cu bo ta identifica bo mes cu ne. Den e cuadro aki por bisa cu cultura y idioma materno por ta intimamente liga cu otro. Basa riba identificacion externo, por bisa cu idioma materno ta e idioma cu otro hende ta identifica bo cu ne. Basa riba competencia, por bisa cu bo idioma materno ta esun cu bo ta domina miho. Y por ultimo por bisa tambe cu, basa riba uzo, idioma materno ta e idioma cu bo ta uza mas.

21 di februari ta Dia Internacional di Idioma Materno. Relaciona cu e fecha importante aki, y den cuadro di promocion di nos idioma materno Papiamento, Departamento di Enseñansa lo presenta un serie di programa na television cuminsando dialuna 1 di maart. Ta trata aki di un programa di wega titula “Papiamentistica”, caminda e miembronan di prensa lo midi nan conocemento di nos idioma Papiamento. E programa ta uno recreativo pero alabes educativo, caminda tanto e participante como e televidente por siña hopi tocante Papiamento.

E programanan aki ta parti di e campaña di promocion “Nos idioma ta den bo man. Papiamento, cuid’e!”.