Resultado di encuesta nacional ‘Ambiente di lesamento di mucha’

Oranjestad – Na comienso di aña 2008 Fundacion Papiamente conhuntamente cu Sra. Murielle Brown-Roos, studiante y stagiaire den su ultimo aña na I.P.A., a traha hunto pa introduci un sondeo como meta pa analisa e ambiente di lesamento di muchanan di 0 pa 5 aña na Aruba. A traha e encuesta aki den cuater idioma pa facilita tur mayor cu kier a participa na e sondeo menciona. E proceso di encuesta a cuminsa dia 5 di mei y a sigui te cu 20 di augustus. Un total di 848 mayor a coopera cu e investigacion aki durante nan bishita di consulta na Wit Gele Kruis. Cu e cantidad di participacion aki Fundacion Papiamente a hasta surpasa e cantidad minimo cu tabata necesario pa por haci un analisis representativo di e resultadonan. A realisa e logro aki cu sosten y cooperacion di e team dinamico di Wit Gele Kruis Aruba.

E meta di e estudio di ambiente di lesamento tabata pa Fundacion Papiamente haya un mihor bista riba e ambiente di lesamento na cas y e habito y actitud di e mayornan of educadonan, di muchanan di 0 pa 5 aña, respecto lesamento den bos halto. Pa medio di e investigacion aki Papiamente kier a haya informacion specifico, manera por ehempel: e idioma cu e mayornan ta lesa den bos halto, e idioma cu mayornan ta uza pa combersa cu nan yiu di e buki, si tin material di lesa na cas, con mayornan ta yega na material di lesa, e frecuencia di lesamento den bos halto, duracion di lesamento, etc.

Algun conclucion di e encuesta di e ambiente di lesamento di muchanan di 0 pa 5 aña ta:

• Mayornan/educadonan di e muchanan di e edad concerni, ta considera lesamento den bos halto importante; e motibonan principal cu nan ta duna ta: e desaroyo di conocimento general di nan yiu y lesamento ta contribui na e desaroyo di idioma di nan yiu.

• Un gran mayoria di e mayornan/educadonan ta lesa den bos halto pa nan yiu.

• E habito y actitud respecto lesamento den bos halto a mehora den un generacion, mirando cu tin mas mayor/educador cu ta lesa den bos halto cu nan yiu, compara cu e generacion anterior. Tambe por bisa cu e chens ta mas grandi cu un mayor lo lesa den bos halto pa su yiu, si e mayor a  haci esaki tempo cu e tabata mucha. Apesar cu tin otro factornan cu ta hunga un parti den e motibonan pa cua mayornan ta lesa pa nan yiu, por bisa cu lesamento den bos halto pa mucha ta engrandece e posibilidad cu e di tres generacion tambe lo lesa den bos halto.

• Den e caso di mayornan cu no ta lesa den bos halto pa nan yiu(nan), e motibo principal a resulta di ta scarsedad di tempo. E di dos motibo cu mayornan no ta lesa pa nan yiu(nan) ta cu nan ta haya e mucha hopi chikito ainda pa lesa p’e.

• Un gran mayoria di e mayornan cu ta lesa den bos alto pa nan yiu(nan) ta haci esaki na Papiamento. Hasta si un mayor scoge pa lesa un buki den un otro idioma, e dioma cu e ta combersa cu su yiu(nan) di e buki ta den idioma Papiamento.

• Un gran cantidad di e mayornan cu ta lesa den bos alto pa nan yiu(nan) no ta miembro di Biblioteca, resultando den e porcentahe asombroso di 70%.

Cu e resultadonan di e analisis aki, Fundacion Papiamente a logra obtene informacion valioso pa por introduci proyectonan efectivo. Asina ta stimula e placer di lesamento y ta enfoca e puntonan mas crucial di e necesidad pa mehora e ambiente di lesamento na Aruba.