Setar ta uni cu Departamento di Enseñansa pa promocion di Papiamento

Oranjestad – Den cuadro di e proyecto di promocion “Nos idioma ta den bo man. Papiamento, cuid’e!” Departamento di Enseñansa Aruba a uni cu Setar pa ofrece informacion di nos idioma Papiamento den buki di telefon.

Pa ser exacto, pagina 19 te cu 24 di e seccion “community pages” di bo buki di telefon 2011 ta contene entre otro algun regla di ortografia y gramatica di Papiamento.

Esaki no ta prome biaha cu Setar ta coopera cu Departamento di Enseñansa pa promocion di Papiamento. Anteriormente den buki di telefon di aña 2010 ya caba Setar a publica algun pagina cu informacion y incluso a dedica su portada na nos idioma Papiamento cu e dicho “Solo ta sali pa nos tur”. 

Recientemente Departamento di Enseñansa a produci un marcapagina cu por wordo uza hunto cu e buki di telefon. Na un banda di e marcapagina ta duna informacion general di nos idioma y e otro banda tin espacio pa bo nota bo numbernan mas importante. E clientenan di Setar lo ricibi un marcapagina di Papiamento hunto cu nan cuenta.

E proyecto di promocion “Nos idioma ta den bo man. Papiamento, cuid’e!” cu a inicia na aña 2008 a ofrece diferente material den transcurso di e añanan manera kalender di Papiamento, poster, sticker y t-shirt cu diferente expresion pa nos hobennan. A duna tayer di idioma Papiamento na mas cu 400 persona cu ta labora den agencianan di publicidad, prensa y otro medionan di comunicacion. A presenta algun programa di wega y di papia na television y a estrena e documentario “Papiamento, Nos Idioma” durante un anochi di “Tapijt Cora”. Pa e documentario cu despues tambe a bay television, a combersa cu un gran cantidad di experto cu a comparti nan conocemento y experiencia, cu e meta pa duna informacion y presenta echo relaciona cu nos idioma Papiamento.

Tur cu ta desea di sa mas tocante Papiamento por bishita e website www.papiamento.aw cu ta contene informacion tocante historia y desaroyo di nos idioma, diferente articulo tanto general como cientifico, lista di buki y diccionario, como tambe regla di gramatica y ortografia di Papiamento. Na momento di duda con ta skirbi un of otro palabra, por consulta e “Vocabulario Ortografico di Papiamento” cu ta un lista cu ta contene mas cu 17.000 palabra, obtenibel pa un y tur por download for di riba e website. Esnan cu ta desea di comparti nan opinion of simplemente papia riba e topico aki, por acudi na e pagina Papiamento Aruba riba Facebook.

Cada un di nos por yuda tene Papiamento na un nivel eleva. Cada un di nos ta importante pa yuda
transmiti nos idioma Papiamento di un generacion pa otro den forma corecto. Nos ta masha agradecido na Setar pa su cooperacion y na comunidad di Aruba pa acepta e producto di mas nobo cu ta e marcapagina!