Aplicacion nobo y practico pa busca palabra na Papiamento

21/07/2018

Oranjestad – Riba Dia Internacional di Idioma Materno, Departamento di Enseñansa Aruba (DEA) a introduci un instrumento nobo riba su website [papiamento.aw], un instrumento practico pa busca con pa skirbi un palabra na Papiamento den e ortografia di Aruba.

Ya pa basta aña tabatin un lista di palabra publica den e formato di pdf. Awo (2018) a crea un aplicacion nobo cu ta ofrece un forma mas practico pa busca palabra via e website. Loke ta nobo ta cu awo bo por cuminsa type e palabra cu bo ta busca y e website mes ta mustra bo diferente palabra cu ta contene e letternan cu bo a type.

E aplicacion aki ta deriva di e lista di palabra skirbi segun e reglanan stipula den “Ortografia di Papiamento – version april 2009” y publica den e “Vocabulario Ortografico di Papiamento” (buki blauw).

Vocabulario Ortografico di Papiamento

E “Vocabulario Ortografico di Papiamento” ta un lista cu ta contene mas cu 17.000 palabra. Meta di e publicacion ta pa yuda e usuario ora e kier sa con pa skirbi palabra segun e ortografia di Aruba. E vocabulario ta inclui palabra cu ta wordo uza tur dia, pero tambe algun palabra di antaño, nomber di mata, pisca y algun nomber geografico. No mester considera e vocabulario aki como un lista completo di tur palabra na Papiamento. Den transcurso di tempo e lista lo sigui crece.

Como base a haci uzo di un lista di palabra compila pa Mario Dijkhoff (d.f.m.). Un grupo di trabou di Departamento di Enseñansa Aruba, incluyendo algun miembro di otro departamento, a haci e trabou di evalua cua palabra ta forma parti di e lista aki y a pone e palabranan den e forma ortografico corecto. Un grupo di trabou mas chikito a traha riba e redaccion final. A base di comentario cu a drenta, a haci algun adaptacion na e lista, cu ta encera ampliacion y algun coreccion.

E lista aki awo ta completamente incorpora den un aplicacion nobo riba e website.

Gradicimento

Un palabra di gratitud ta bay na e desaroyador di e instrumento valido aki.

E aplicacion aki a keda crea y implementa gratuitamente pa Sr. Dwayne Heronimo di e compania local Orbitalnets, cual compania ta facilita e administracion tecnico di e website [Papiamento.aw] ya pa hopi aña.

E aplicacion aki sigur lo cumpli cu un demanda grandi, no solamente di parti di e campo di enseñansa, sino tambe di parti di pueblo di Aruba en general. Cu e aplicacion aki e uzadonan di Papiamento skirbi tin un instrumento practico cu nan por haci uzo di dje tur dia.

Desde 21 di februari 2018 e aplicacion aki ta obtenibel via nos website: [papiamento.aw/busca].

Ta e intencion di Gobierno di Aruba hunto cu e compania Setar NV pa den futuro crea tambe un “mobile app” pa autocoregi Papiamento den celular.

Pa mas informacion por acudi regularmente na nos website [papiamento.aw] y por sigui e desaroyonan a traves di Twitter @PapiamentoAruba y Facebook @PapiamentoAruba.

#Papiamento

Scroll To Top

Papiamento