Papiamento

Ta depende kico bo kiermen cu dialecto. For di punto di bista di ciencia Papiamento ta tur dos y esaki ta conta pa tur idioma. Spaño ta un idioma, pero por wak e tambe como un dialecto cu a bin di Latin. Y toch niun hende no ta bisa cu Spaño ta un dialecto. Pasobra Spaño ta wordo considera como un idioma cu hopi balor y prestigio. Y hopi biaha, ora hende bisa cu un idioma ta un dialecto, nan kiermen cu e idioma ey tin menos balor, sea pasobra nan ta pensa cu e no tin gramatica, of cu e ta un variante menos bunita di un otro idioma, etc.

Si un hende bisa cu Papiamento ta un dialecto den e sentido ey, esey no ta berdad. Papiamento tin su structura y su reglanan y ta di mesun balor cu cualkier otro idioma na mundo. E no ta un dialecto di Spaño ni di Portugues tampoco, pasobra Papiamento ta un tipo di idioma diferente compara cu e dos idiomanan menciona. Papiamento ta un idioma crioyo, mientras cu Spaño y Portugues ta idiomanan indo-europeo. For di punto di bista oficial, pais Aruba a duna Papiamento reconocemento como idioma, ya cu el a wordo oficialisa na aña 2003.

Pa mas informacion: Idioma General.

Dia 21 di mei 2003 Parlamento di Aruba a tene un reunion caminda a decreta Papiamento y Hulandes como idioma oficial. Esaki ta encera cu tur ciudadano na Aruba por dirigi su mes na Gobierno na Papiamento of Hulandes.

Pa mas informacion: Papiamento / Status Actual.

Tur idioma di un comunidad por ta apto pa tur funcion den e comunidad ey. Pero tin biaha pa motibonan historico un idioma no ta haya e oportunidad pa desaroya su mes pa bira e instrumento di comunicacion den cierto areanan. Un tempo no tabata considera Hulandes un idioma apto pa skirbi tratadonan cientifico, Latin tabata e idioma pa esey. Cu tempo Hulandes a haya mas funcion y awor ta us’e pa ciencia tambe. Cu e ehempel aki kier ilustra cu Papiamento riba su mes ta apto, pero mas funcion e haya, mas grandi e necesidad pa ekipa e idioma cu termino specifico ta bira.

Literatura no ta duna un cifra concreto di e cantidad di hende cu ta papia Papiamento na mundo, pero e ta varia entre 250.000 pa 330.000. Cu siguridad por bisa cu Papiamento y Islandes (idioma di IJsland) tin mas o menos e mesun cantidad di hablante.

Tin diferente teoria di unda Papiamento ta bin, pero ta dificil bisa cua teoria ta esun corecto. Loke si por bisa ta cu Papiamento ta un idioma cu a desaroya su mes door di e contacto entre hablante di diferente idioma. Pa comunica cu otro nan a crea un idioma nobo y asina den transcurso di tempo Papiamento a bira loke e ta awe.

Pa mas informacion: Papiamento / Historia.