Awe ta Dia di Lenga Materno

21/02/2011

100818

Oranjestad – Unesco a declara dia 21 di februari como Dia Internacional di Idioma Materno. Riba e fecha aki mundo henter ta pone atencion na e mas o menos 6000 idiomanan materno cu ta existi na mundo. E meta di e dia aki ta pa conscientisa balor di idioma den un sentido general y di idioma materno particularmente. E idioma cu bo ta papia for di tempo cu bo tabata chikito y cu bo mama, tata y otro persona den cas a siña bo, esey ta bo idioma materno. Materno ta bin di e palabra mater cu ta e palabra Latin pa mama.

Idioma crioyo a nace for di e necesidad di comunica entre adulto cu no ta papia otro su idioma materno. Ta yama e idioma di contacto aki un pidgin y na momento cu un mucha cuminsa papi’e como idioma nativo ta referi na dje como un idioma crioyo. Esaki tabata tipico den tempo colonial, caminda un grupo dominante tabata colonisa un grupo subordina. Ta mara un idioma crioyo na un idioma fuente, dependiendo for di unda su vocabulario ta bin principalmente. Den Caribe nos conoce por ehempel Creole Frances di Haiti cu ta basa riba Frances, Crioyo Ingles di Jamaica cu ta basa riba Ingles y crioyo Portugues cu ta basa riba Portugues manera nos propio Papiamento.

E cinco idiomanan principal na mundo ta Chines cu 1.000 miyon papiado, Ingles cu 350 miyon, Spaño cu 250 miyon, Hindi cu 200 miyon y Arabe cu 150 miyon. Aunke Ingles tin menos papiado cu Chines e ta awendia un idioma mundial, esey ta nifica cu gran parti di mundo ta compronde bo ora bo papi’e. Ta uz’e entre otro tambe como idioma di comunicacion den control di trafico aereo y mundo di computer.

Aki ta sigui con ta bisa ‘Te despues’ na 10 diferente idioma:
Te despues – Papiamento
Tot ziens – Hulandes
See you later – Ingles
Au revoir – Frances
Tjoi Kin – Chines
Hasta la vista – Spaño
W’e sie makandra – Sranang
Arrivederci – Italiano
Auf Wiedersehen – Aleman
Pgatrik (pa muhe) – Arabe
Pgatrak (pa homber) – Arabe

Tur e idiomanan aki tin hende cu ta biba na Aruba cu tin nan como nan idioma materno.

Swinda Schwengle

Scroll To Top

Papiamento

Awe ta Dia di Lenga Materno

Archivo

Tocante

Contacto

Menu