Test bo conocemento di Papiamento

01/03/2010

090820 Oranjestad – “Nos idioma ta den bo man. Papiamento, cuid’e!” ta lema di e campaña di promocion organisa pa Departamento di Enseñansa. Pa duna aporte na e cuido di Papiamento, Departamento di Enseñansa ta ofrece tambe diferente herment. Den pasado a publica articulo, organisa tayer y a presenta diferente programa na television, pa menciona algun. Mientras cu e documentario “Papiamento, Nos Idioma” tabata di un caracter informativo, e programanan “Papiamento di Papiamento” a trece e oportunidad pa discusion sano tocante nos idioma. Siguientemente lo bay presenta un serie di programa di wega titula “Papiamentistica”.

Ta trata aki di un programa caminda e miembronan di prensa lo midi nan conocemento di nos idioma Papiamento. E medionan di comunicacion ta hunga un papel importante den nos comunidad pa loke ta trata uzo di Papiamento. E grupo aki por yuda pueblo conoce e idioma Papiamento miho y asina promove su uzo corecto.

Den pasado mayoria di e medionan di comunicacion a participa na e tayer basico di Papiamento. E tayer tabatin un contenido amplio caminda e participantenan a conoce Papiamento como un idioma completo cu tur su reglanan. Awor ta e momento pa trece e conocemento aki mas cerca di e publico general. P’esey a scoge pa entre otro un programa di wega, caminda na un manera entretenido lo educa e televidente riba Papiamento. E wega ta consisti di diferente categoria manera spel palabra, conocemento di expresion, dicho y proverbio y preguntanan general relaciona cu Papiamento.

Durante e prome edicion di “Papiamentistica”, e bataya ta entre e team di Bon Dia Aruba y esun di Canal 90. Sintonis’e awe, dialuna 1 di maart pa 8.30 or di anochi na ATV y pa 9 or di anochi na Telearuba.

Scroll To Top

Papiamento

Test bo conocemento di Papiamento

Archivo

Tocante

Contacto

Menu