Revista pa mucha ‘Cleconchi’

21/01/2010

010121 Oranjestad – Dia 21 di januari 2010 e mercado di publicacion pa mucha a wordo enrikese cu un revista cu e titulo Cleconchi. Nos tin un dicho ta bisa: el a pega mane un cleconchi riba mi. Esaki ta exactamente loke nos kier: pa e revista pega na curason di cada mucha. E revista aki ta specialmente diseña pa mucha di 5 pa 12 aña. E revista aki sigur ta bay tin un impacto educacional y artistico enorme. E revista ta duna cada mucha e oportunidad pa siña lesa, hunga y desaroya e parti intelectual ya cu e revista ta forma un reto pa engrandece su conocemento cognitivo.

E vision di e revista ta pa traha un producto cu lo yuda e mucha den su desaroyo personal y a la vez concientisa e mucha di su propio identidad y di su cultura. Tur esaki lo wordo haci posibel atraves di articulo, storia, y wega educativo. E revista tambe lo duna realse na un infancia saludabel. E vision tambe ta pa comparti un di nos mihor herencia: nos hermandad cu e otro islanan cu ta uni nos pa medio di nos lenga materno Papiamento.

Nos rubiano ta orguyoso di e manera amical cu nos ta trata otro y cu a forma nos ‘trade-mark’ cu e turistanan. Esaki ta un actitud cu nos mester keda fomenta den tur mucha. E revista lo pone hopi atencion na e habilidad aki; trata otro na un forma amabel.

Mision di e revista ta pa desaroya y encurasha un refleho claro y fuerte den nos hobennan. Promove y preserva nos idioma Papiamento, dunando informacion pa medio di material literario cu a la ves lo ta un promocion di lesamento. Duna balor na nos mesun hendenan, reconoce y cultiva admiracion pa nos artistanan den diferente diciplina. Y bibando den un comunidad multicultural ta necesario pa siña e mucha respeta cada cultura. Nos custumbernan tambe lo wordo enfoca ya cu esaki ta e fundishi di nos cultura.

E revista Cleconchi ta obtenibel na cada scol y supermercado. Ta facil pa regala bo yiu un mangel, cuki, of pastechi, pero mas importante ta pa dun’e e herment cu cual e por forma su educacion. Y esaki Cleconchi ta; un herment den su educacion. Pa mas informacion por mail Sra. Sheila Werleman na [email protected].

Scroll To Top

Papiamento

Revista pa mucha ‘Cleconchi’

Archivo

Tocante

Contacto

Menu