Busca Palabra

Encuesta

Ki ora bo ta cuminsa bisa otro “bon tardi”?

View Results

Loading ... Loading ...

Proyecto Scol Multilingual

Conferencia linguistico Internacional

Publica: 20/02/2014

100818

Oranjestad – Fundacion Lanta Papiamento ta organisa Conferencia di Society for Caribbean Linguistics (SCL) 2014 na Aruba. Esaki lo ta e di 20 Conferencia Bienal di SCL y lo tuma luga na Holiday Inn Resort na Aruba di dia 5 pa dia 8 di augustus 2014. E tema principal di e Conferencia ta The Caribbean Today: Language Awareness and Language Development (Caribe awe: Consenshi Linguistico y Desaroyo di Lenga).

Na october 2012 Fundacion Lanta Papiamento (FLP) a haya e peticion pa ta anfitrion na Aruba di e conferencia di Society for Caribbean Linguistics (SCL), organisa conhuntamente cu Society for Pidgin and Creole Linguistics (SPCL) y Associação de Crioulos de Base Lexical Portuguesa e Espanhola (ACBLPE). Esaki lo ta e di 20 Conferencia Bienal di SCL y lo tuma luga na Holiday Inn Resort na Aruba di dia 5 pa dia 8 di augustus 2014.

E organisadornan ta haci un peticion na tur linguista di Caribe y personanan interesa rond mundo pa manda nan resumen tratando un tema tocante cualke sorto di lenga di Caribe: lenga Pidgin, lenga papia y lenga di seña, lenga Amerindio (Indjan), lenga Crioyo, tur variedad di lenga standarisa, lenga oficial y lenga no-standarisa, lenga di inmigrante, lenga di herencia historico, lenga den peliger di extincion y lenga religioso y ritual. Ta invita particularmente pa manda tur sorto di resumen perteneciente na temanan y situacionnan linguistico di Aruba, Boneiro y Corsou cu un enfoke particular riba Papiamento (den cualke subdisciplina linguistico).

 

 

Organisacion di e Conferencia na Aruba

FLP a acepta e peticion pa organisa un Comite Organisado Local (COL). Rapidamente despues di aceptacion di e tarea menciona FLP a invita representante di departamentonan gubernamental y di otro Organisacion No Gubernamental (ONG) pa pone nan na haltura di e proyecto. Tur a acepta pa ta participante den e importante reto aki. A forma e Comite Organisado Local (COL) y a cuminsa mesora cu e proceso di planificacion. Oficialmente Fundacion Lanta Papiamento, hunto cu Instituto Pedagogico Arubano (IPA), Departamento di Cultura Aruba (DCA) y Biblioteca Nacional Aruba (BNA), ta anfitrion di e Conferencia.

Otro departamento y organisacion cu ta sostene e proyecto aki como parti di e COL ta Ministerio di Cultura, Departamento di Enseñansa Aruba (DEA), Universidad di Aruba (UA), Fundacion Bon Nochi Drumi Dushi (FBNDD) y Grupo di Corector di Papiamento.


Importancia di SCL pa Caribe y Aruba

SCL ta un sociedad academico linguistico cu ta dedica su mes na estudio di idioma den Caribe y cu ta percura pa publicacion di e resultadonan di e investigacionnan aki. SCL a lanta na 1968 durante e Creole Linguistics Conference na Jamaica y a keda formalmente estableci na juli 1972 na Trinidad & Tobago y e prome conferencia di SCL a tuma luga na 1976 na Universidad di Guyana. Cada dos aña ta tene un conferencia na un pais den Caribe. Esaki lo ta e di dos biaha cu e conferencia di SCL lo ta na Aruba. E prome biaha tabata na 1980, tempo cu Ramon Todd Dandaré tabata vice-presidente. Na 1982 Ramon Todd Dandaré a bira presidente di SCL.


Meta di e Conferencianan Bienal di SCL

E metanan di SCL ta di promove estudio di idioma cu un enfoke special riba Caribe y envolve hende interesa di tur parti di mundo. Tur investigacion y publicacion di e miembronan di SCL semper tabata dirigi riba linguistica teoretico y aplica cu un atencion creciente pa e papel y desaroyo di idioma den educacion den Caribe. Nan ta investiga e idiomanan di Caribe di tur origen y epoca, incluso e idiomanan Indjan for di epoca precolombino y e idiomanan di e epoca colonial tanto Europeo, Africano como Asiatico y specialmente e idiomanan Crioyo Caribense. Por considera e miembronan di SCL pionero riba tereno di reconocemento y estudio di e idiomanan crioyo aki. SCL, pues, ta enfoca riba estudio di e idiomanan y e situacion di idioma di e teritorionan insular y continental di Caribe y otro teritorio cu laso historico y actual cu Caribe. Ta haci investigacion tambe di idioma di comunidad di origen Caribense rond mundo.

SCL ta invita y encurasha academico, studiante, educador, escritor y publico general pa participa na su conferencianan. Na e conferencianan aki por participa na charla, tayer, presentacion di poster y presentacion plenario. Y semper tin oportunidad amplio pa participa den discusion linguistico. Pa nos pais Aruba esaki ta un oportunidad grandi pa presenta na mundo loke nos a logra den e ultimo añanan y pa adkiri mas conocemento y contacto, loke ta asina importante den e fase di desaroyo cu nos ta aden.


Programa tentativo

Ta claro cu na e momento aki e programa ta tentativo. Aworaki e participantenan ta entregando nan resumen. Banda di 15 di april lo por tin un bista mas cla di e programa. Nos tin diferente orador principal, esta Dr. Hubert Devonish di Jamaica, Dr. Mervyn Alleyne di Jamaica, Dr. Manuel Veiga di Cabo Verde, Dr. Marta Dijkhoff y Dr. Ronald Severing di Corsou, y Ramon Todd Dandaré Mag. Ling. di Aruba.


Sala di Papiamento

Importante pa menciona ta cu na e conferencia lo tin un Sala di Papiamento, na unda lo tin un programa special relaciona cu Papiamento. Lo enfoca aki riba idioma Papiamento, su historia, su literatura y otro expresionnan artistico, su luga y papel den enseñansa y den comunidad.

Fundacion Lanta Papiamento ta invita en particular tur linguista, educador y studiante di idioma, y en general tur otro persona interesa di Aruba, Boneiro y Corsou pa participa na e Conferencia Linguistico importante aki cu lo tuma luga di 5 pa 8 di augustus 2014 aki na Aruba.


Mas informacion

scl-online.net

 

Scroll To Top