Busca Palabra

Encuesta

Ki ora bo ta cuminsa bisa otro “bon tardi”?

View Results

Loading ... Loading ...

Proyecto Scol Multilingual

Conferencia “Papiamento idioma oficial”

Publica: 13/11/2018

Oranjestad – Recientemente a tuma luga na Aruba un conferencia organisa pa Plataforma Union di Papiamento, cu ta consisti di 5 diferente fundacion di e islanan ABC y di Hulanda. Meta di e Plataforma ta pa traha hunto pa promove, enforsa y desaroya Papiamento.

 

Pa motibo cu e aña aki Aruba ta celebra cu Papiamento ya tin 15 aña como idioma oficial na Aruba, a dicidi di tene e conferencia aki na Aruba. Fundacion Lanta Papiamento tabata e anfitrion.

Na apertura di e conferencia tabatin discurso di Minister di Cultura di Aruba, Sra. mr. Xiomara Ruiz-Maduro y di Minister di Enseñansa, Sr. dr. Rudy Lampe.

Potret cortesia di MinFEC, Xiomara Ruiz-Maduro

Tambe tabatin discurso di diputado di Boneiro, Sr. Cecilia y di e representante di minister Alcala-Wallé di Corsou, Sr. Kleinmoedig. Durante e conferencia tabatin diferente parlamentario presente, entre otro Sra. Sueann Ras, Sra. Shailiny Lee y Sr. Ricardo Croes.

 

Charla y tayer

Banda di e representantenan di e diferente fundacionnan, cu a duna un presentacion tocante e situacion di idioma na nan isla of tocante nan vision riba desaroyo di Papiamento, tabatin otro orador tambe.

Di parti di Aruba tabatin charla di Audrey Tromp-Wouters, Régine Croes y Merlynne Williams.

Sra. Tromp tabatin como topico “Papiamento 2030, desaroyo di Papiamento na Aruba”. Den su charla el a pidi pa pensa den ki direccion nos kier bay cu Papiamento na Aruba den futuro. Tambe el a pidi pa reflexiona riba varios pregunta manera “Ken mag participa den e proceso pa dicidi kico ta bon Papiamento?” y “Kico e rol di gobierno ta den esaki?”. Sra. Tromp a duna algun ehempel, caminda diferente pais ta traha hunto riba idioma (manera Hulandes y Spaño), pero caminda cada pais tin su propio instituto of academia di idioma cu tin autoridad riba nan propio idioma standaard.

E charla di Régine Croes y Merlynne Williams tabatin como topico “Scol multilingual, resultado te awo” y ta elabora riba e resultadonan di e investigacion haci na 2016, pa wak ki efecto e modelo multilingual tin riba siñamento di e muchanan. Sra. Williams a mustra tambe riba e balor adicional cu Papiamento tin como idioma di instruccion.

Banda di e charlanan tabatin diferente tayer. Asina entre otro Pedro Velásquez a trata e ley di oficialisacion di Papiamento y kico falta, Martha Dijkhoff a trata e mundo digital na Papiamento y Ramon Todd Dandaré tabatin un tayer tocante emancipacion di Papiamento.

Un cos cu a resalta for di e conferencia ta cu na Boneiro 40% so di e poblacion ta Boneriano di habla Papiamento y si conta e Curasoleñonan cu e Arubianonan cu ta biba ayanan acerca, e cifra ta yega na 60%. Pa e motibo ey un di e tayernan tabatin como topico con por yuda Boneiro. E tayer ey tabata bou guia di Mientje Croes y Eduard Pieters.

Na final di e conferencia, cada fundacion a trece su punto di bista dilanti con por sigui traha hunto riba desaroyo di Papiamento y a palabra cu otro aña lo tin un conferencia atrobe. Minister Lampe a enfoca riba e importancia di e acuerdo di cooperacion cu Aruba a firma cu Corsou riba tereno di Papiamento y cu pronto lo firma e acuerdo aki cu Boneiro tambe.

Scroll To Top