Documentario “Papiamento, Nos Idioma” na ATV

21/05/2010

100329

Oranjestad – Dia 21 di mei 2003 Parlamento di Aruba a proclama Papiamento y Hulandes como idioma oficial na Aruba pa medio di un ordenansa. E ley ta encera entre otro cu un ciudadano por skirbi carta oficial pa gobierno na Papiamento tambe. Pa duna atencion na e echo cu ya ta 7 aña cu Papiamento ta idioma oficial na Aruba y den cuadro di promocion di Papiamento, Departamento di Enseñansa ta presenta e documentario “Papiamento, Nos Idioma” dialuna 31 di mei pa 9or di anochi na ATV.

Meta di e documentario ta pa eleva e aprecio pa Papiamento door di duna informacion y presenta echo relaciona cu nos idioma. Pa logra esaki a combersa cu un gran cantidad di experto cu a duna tempo pa comparti nan conocemento y experiencia. Investigacion y redaccion tabata den man di Proyecto Idioma di Departamento di Enseñansa, bou guia di Rebecca Roos kende a percura pa e script. Produccion tabata na encargo di ECA.

E produccion, cu tin un duracion di 70 minuut, ta forma parti di e campaña di promocion “Nos idioma ta den bo man. Papiamento, cuid’e!”, un proyecto financia pa Fondo Desaroyo Aruba y cu ta na encargo di Departamento di Enseñansa.

Intencion di e documentario “Papiamento, Nos Idioma” ta pa nos tur, adulto y hoben haya sa mas tocante Papiamento. Mas nos sa di nos idioma, mas nos lo sa di dun’e su balor y sa con pa defend’e. E documentario lo lanta nos curiosidad pa nos sigui explora y investiga nos idioma.

Tur cu ta desea di haya mas informacion tocante Papiamento por bishita e website www.papiamento.aw. E website ta contene informacion tocante historia y desaroyo di nos idioma Papiamento, diferente articulo tanto general como cientifico, lista di buki y diccionario, como tambe regla di gramatica y ortografia di Papiamento. Na momento di duda con ta skirbi un of otro palabra, por consulta e “Vocabulario Ortografico di Papiamento” cu ta un lista cu ta contene mas cu 17.000 palabra, obtenibel pa un y tur por download for di riba e website.

Den e buki di telefon di Setar 2010 tambe por haya informacion tocante regla di gramatica y ortografia di Papiamento cuminsando na pagina 18 di e seccion “community pages”.

Esnan cu ta desea di comparti nan opinion of simplemente papia riba e topico aki, por acudi na e pagina “Papiamento Aruba” riba Facebook.

Sintonisa ATV canal 15, dialuna 31 di mei 9or di anochi pa e documentario “Papiamento, Nos Idioma”.

Scroll To Top

Papiamento

Documentario “Papiamento, Nos Idioma” na ATV

Archivo

Tocante

Contacto

Menu