Festival di Buki pa Mucha 2020

19/10/2020

Oranjestad – Biblioteca Nacional Aruba (BNA) ta organisa Festival di Buki pa Mucha. Un proyecto anual pa stimula lesamento cerca tur mucha den comunidad. E tema di e festival 2020 ta ‘Historia’ cu e lema ‘Tempo di mi tempo’.

Biblioteca Nacional Aruba ta organisa e festival aki pa stimula mucha pa lesa y lanta nan interes pa storia y tambe pa tur tipo di topico. Lesamento ta enrikece e imaginacion, dominio di idioma y tin hopi mas beneficio.

Durante Festival di Buki pa Mucha 2020 e atencion ta bay riba storia y informacion historico, e muchanan por bay bek den pasado pa descubri e mundo di antes.

E aña aki e festival ta bay ta un poco diferente. E aña aki e festival ta den un forma nobo digital. Actualmente diferente presentacion ta wordo graba den Studio di biblioteca. Esaki pasobra bishita na scol ta poco limita. Den Studio di biblioteca ta prepara e presentacion di autor di buki pa mucha y tambe ilustrador.

E Festival di Buki pa Mucha ta tuma lugar den e prome siman di november: dia 30 di october pa dia 6 di november 2020. Mas cu 60 scol ta participa na e actividadnan online.

Apertura di e festival lo ta via Aruba.tv (Canal 49), diabierna dia 30 di oktober pa 7or.

Buki Special

Biblioteca a laga produci un buki special pa e siman cohuntamente cu Levendig Uitgeverij na Hulanda. Esaki ta un compilacion di storia. Scolnan participante ta haya e buki gratis. E buki a keda bunita ilustra pa e conocido artista visual, Elvis Tromp. Elvis a keda inspira pa e tema ‘Historia’ y a pinta un ilustracion pa cada storia. Elvis ta prepara un presentacion pa duna muchanan e sabor di pintamento. Riba website di biblioteca por lesa mas di Elvis Tromp. Un di e ilustracionnan di Elvis a bira logo pa e festival. Claro cu tin un cantica pa e festival canta pa Ambar Silva, Ces Sy y Ryah Sy, titula ‘Lesa y lo bo wak’. Musica a keda produci pa Mario Chow, Sergio Silva y Jeremy Bonarriba, letra ta di Sergio Silva y Arreglo musical ta di Jeremy Bonarriba. E grabacion y mezcla a wordo haci den Sunny Ray Studio.

Autor y ilustrador

Escritornan cu ta parti di e festival 2020 ta: Jeroen Hoogerwerf, Evelien van Dort y Lizzy van Pelt.

For di Corsou biblioteca a invita Tio Ali (Alvin Inecia) y Mercee Doran y di Boneiro ta spera Monica Clarinda.

E grupo di Aruba mes ta consisti di e talentonan creativo: Richard Dabian, Liliana Erasmus, Robert Reeberg, Benjamin Romero y Elvis Tromp como ilustrador. Esaki ta un grupo di profesional riba tereno di conta storia, skirbi storia pa mucha y ilustra storia. Riba biblioteca su website por haya informacion di tur escritor participante y tambe di ilustrador Elvis Tromp. Scolnan participante ta haya e informacion tocante tur escritor di buki pa mucha den nan pakete.

Tayer pa docente

E interes pa e festival semper ta grandi di parti di e scolnan na Aruba. Pa entusiasma y inspira docentenan, biblioteca ta prepara un tayer. Esaki lo bay online. Durante e tayer docentenan ta haya guia con pa traha cu e tema y hopi tips di buki cu por lesa pa e muchanan den klas. Cu e lema ‘Tempo di mi tempo…’ biblioteca ta kick-off e promocion pa su Festival di Buki pa Mucha 2020.

Info / Contact

Biblioteca Nacional Aruba (BNA)

Scroll To Top

Papiamento