Fundacion Papiamente cu proyecto di lesamento ‘Buki Bum’

04/11/2009

091105 Oranjestad – Den luna di october Fundacion Papiamente a celebra nan prome lustro. Despues di 5 aña promocionando e placer di lesamento na Aruba, e fundacion, cu semper a ricibi bon cooperacion di su sponsornan, ta cla pa duna un regalo grandi y permanente bek, segun Sr. Albert Braamskamp, presidente di Fundacion Papiamente.

Como parti di su compromiso cu Aruba, Fundacion Papiamente kier introduci proyectonan di calidad y relevancia pa promove placer di lesamento riba nos isla, cuminsando for di 0 aña bay ariba. E iniciativanan di Fundacion Papiamente lo no wordo implementa sin ningun tipo di estudio of sondeo. E fundacion kier tin e seguridad cu e tempo, e fondonan disponibel y tur esfuerso inverti, ta basa riba cifranan real cu ta indica un necesidad cu por resolve pa medio di un bon plan di maneho y ehecucion. Esaki ta sin descarta e importancia di evaluacion di cada proyecto. Pakico? Fundacion Papiamente ta di opinion cu si kier midi e efectividad di cualkier campaña pa promove lesamento, mester tin un punto di salida y un ruta premedita.

Fundacion Papiamente, despues di algun aña di preparacion, ta kibra e silencio pa splica tocante su campaña mas nobo. E proyecto aki, cu un djis lo wordo revela, ta afilia na un programa di promocion di lesamento internacional cu yama Bookstart – un programa cu a cuminsa na Inglatera y cu ta cosechando exito na tur parti di mundo. Y awor Aruba tambe ta forma parti di e reto di lesamento mundial aki.

E obhetivo ta pa stimula e muchanan di mas chikito y nan mayornan pa disfruta di buki. E motivacion tras di e iniciativa aki ta: mas trempan un mucha yega den contacto cu buki, mas bentahoso su desaroyo na scol, dunando e un adelanto pa henter su bida. Wak un buki hunto, apunta y nombra ilustracion, siña rimanan, conta y scucha storia, tur esaki ta fortalece tambe e laso entre mayor y yiu.

Den luna di november Fundacion Papiamente lo aplica e concepto di Bookstart na Aruba. Esaki lo ta pa medio di un ‘pilot’, cu lo consisti di un tayer facilita pa Sra. Desiree Correa conhuntamente cu miembronan di Fundacion Papiamente, na diferente centro di bario y riba diadomingo. E tayer ta pa mayornan di muchanan naci na 2006, cu ta inscribi na Wit Gele Kruis y cu tin nan carchi di AZV di nan yiu cu nan. Mayornan cu participa na e tayer ‘Con pa lesa cu mi yiu den bos halto’ lo ricibi un tremendo tas cu tres buki nobo nobo, di calidad halto y na Papiamento, pa nan lesa cu nan yiu. Ta trata aki di un buki di prenchi, un buki di ABC y un buki di rima cu su CD. Tambe ta inclui un foyeto cu ta duna tip y informacion adicional con pa lesa cu bo yiu, un marcapagina y mas sopresa.

E meta di e campaña aki ta bay mas leu cu conscientisa e mayornan tocante e importancia di lesamento. No solamente e mayornan lo ricibi e conocemento y hermentnan pa mehora y practica nan habilidadnan, pero nan ta haya e material, e bukinan y tur informacion necesario pa por realisa e meta aki hunto cu nan yiu como regalo! Gratis!

Nomber di e proyecto aki na Aruba? BUKI BUM – Scucha, papia, stima y comparti…
Duna bo yiu e amor pa buki!

Pa mas informacion tocante e proyecto Buki Bum, Fundacion Papiamente y lesamento en general, bishita e website nobo di Fundacion Papiamente: www.fundacionpapiamente.com.

Scroll To Top

Papiamento

Fundacion Papiamente cu proyecto di lesamento ‘Buki Bum’

Archivo

Tocante

Contacto

Menu