IPA cu actividad riba tereno di idioma den enseñansa

08/03/2010

090820 Oranjestad – Durante e siman di 8 pa 12 di Maart 2010 Instituto Pedagogico Arubano lo ta e anfitrion di un delegacion di investigado for di Universidad di Puerto Rico cu lo asisti den investigacion externo den cuadro di e Proyecto Scol Multilingual (PSML) na Aruba. Meta principal di e siman aki ta pa yega na un plan di investigacion pa un temporada largo, trahando hunto den un “comunidad di practica” (communities of practice).

Comunidad di practica ta grupo di hende cu ta comparti un interes of un pasion pa cierto actividad y ta siña con pa haci esaki miho segun cu nan ta interactua cu otro riba un base regular.

E delegacion di investigado ta procedente di Universidad di Puerto Rico, Rio Piedras. Profesor Dr. Nicholas Faraclas ta un profesor den Linguistica cu base na Universidad di Puerto Rico, Rio Piedras y e no ta desconoci na Aruba, ya cu den pasado el a yega di participa na varios ocasion na conferencia of charla tocante idioma. Despues di a ricibi su PhD for di Universidad di California na Berkeley, como tambe diferente beca pa su meritonan (National Science Foundation Fellowship y Fulbright Fellowship) Profesor Faraclas a desaroya y duna diferente curso na nivel universitario y a publica diferente buki y articulo cientifico riba tereno di entre otro sociolinguistica, linguistica descriptivo y linguistica aplica. Den transcurso di e ultimo tres decadanan Profesor Faraclas a haci investigacion riba tereno di idioma crioyo y tambe a promove alfabetisacion na Africa, den e region di Pacifico Sur y Caribe.

Hunto cu Profesor Faraclas otro dos investigado di idioma lo sostene e plan di investigacion local. Ta trata aki di Profesor Dr. Susana de Jesus, cu tin experiencia amplio den ramo di enseñansa multilingual y multicultural. Dr. de Jesus ta docente na e Facultad di Educacion di Universidad di Puerto Rico. Otro investigado cu lo ta presente ta Sra. Pier Angeli Le Compte Zambrana, cu ta promoviendo riba e tereno di idioma den Caribe, y cu lo sondea e posibilidad di implementa e iniciativa unico di e modelo multilingual di Aruba den otro pais den Caribe.

Durante e siman aki cuatro instancia local di enseñansa lo forma e partnernan principal di investigacion:
1. Instituto Pedagogico Arubano (Centro di investigacion y desaroyo di Enseñansa)
2. Universidad di Aruba (Centre for Research & Development)
3. Universidad di Puerto Rico (Profesor Dr. Faraclas, Profesor Dr. de Jesus y Sra. Le Compte)
4. Departamento di Enseñansa (Proyecto Scol Multilingual).

Programa

Banda di diferente encuentro interactivo entre e partnernan di investigacion, lo tin tambe oportunidad pa pueblo en general participa den charla y seminario. Mayoria actividad lo tuma luga na Instituto Pedagogico Arubano (Isaac Wagemakerstraat 11, San Nicolas, Aruba). IPA ta orguyoso di ta e anfitrion di e evento y ta invita tur interesado pa asisti na e siguiente charlanan:

Dialuna 8 di maart 7.30 – 9.00 di anochi

“Community, Multilingualism and Identity: Caribbean English in Aruban Society and Education.”

Orador:
Prof. Dr. Nicholas Faraclas – Professor den Linguistica na Universidad di Puerto Rico.
Prof. Dr. Susana DeJesús – Professor di Universidad di Puerto Rico cu tin experiencia amplio riba tereno di enseñansa multilingual.
Pier Angeli Le Compte – Candidato di PhD den e Programa di Linguistica Caribense na Universidad di Puerto Rico.
Drs. Gregory Richardson – Investigado di CIDE riba tereno di enseñansa y comunidad.
Drs. Merlynne Williams – Investigado di CIDE riba tereno di Idioma

Luga: Sala Madonna, Instituto Pedagogico Arubano.
Entrada: Gratis

Diamars 9 di maart 7.00 – 9.30 di anochi

“Using Papiamento in Aruban Schools: Why it is the right thing to do.”

Luga: Aula, Universidad di Aruba.
Entrada: Gratis

IPA conhuntamente cu e diferente instancianan envolvi ta invita publico en general pa asisti na e charlanan interesante aki. Pa mas informacion por tuma contacto cu Sra. Merlynne Williams, Centro di investigacion y desaroyo di Enseñansa di IPA na telefon 5843100 ext. 231.

Scroll To Top

Papiamento

IPA cu actividad riba tereno di idioma den enseñansa

Archivo

Tocante

Contacto

Menu