Manual di Gramatica di Papiamento

01/12/2011

100818

Oranjestad – Diaranson, 30 di November 2011, a tuma luga un anochi unico pa presenta y celebra publicacion di e prome manual di gramatica di Papiamento di Departamento di Enseñansa di Aruba.

Biblioteca Nacional na Bachstraat a habri su portanan pa e invitadonan di e evento festivo aki. Dignatarionan, autornan, corectornan y maestronan tabata entre e publico presente cu a bin admira e buki ‘Manual di Gramatica di Papiamento – Morfologia’, un publicacion diDepartamento di Enseñansa Aruba.

Pa trece ambiente y duna un toke special na e anochi aki, tabata presente Rincon Boys y e poetanan Rosabelle Illes, Selvia Lumenier cu declamacion di Diana Marchena, y ganador di Arte di Palabra 2010, Laura Kock.

E manual ta dirigi na tur hende cu ta interesa pa haya un bon conocemento di gramatica di Papiamento. E buki, cu tin un tremendo potret di e cuebanan na Canashito riba kaft, cortesia di Museo Arkeologico Nacional di Aruba, ta bay tur scol como material di sosten pa maestro. Prensa, departamentonan di gobierno y tur instancia of fundacion cu por haci bon uzo di dje tambe por conta cu un ehemplar. Entrante januari 2012 lo cuminsa cu distribucion di e manual di gramatica.

E herment valioso aki pa nos idioma materno a wordo publica despues di un trayecto largo, cu tabata encera trabou intensivo cu hopi discusion pa fiha e contenido y tene cuenta cu tur detaye. E grupo di trabou, cu tabata consisti di Sra. Elvia Solognier-Croes, Sr. Etley Lasten, Sra. Selvia Lumenier, Sr. Juan Maduro, Sra. Filomena Schwengle, Sr. Ramon Todd Dandaré, Sr. Pedro Velazquez, por ta sumamente satisfecho cu e producto final. Diseño di e buki bunita aki tabata den man di Sra. Sheila Werleman.

A crea e obra aki haciendo uzo di materialnan existente di gramatica, cu e meta pa traha un manual cu ta trata di un manera basico y structura tur e categorianan di palabra. E grupo di trabou mes ta indica cu mas nan a profundisa den e materia, mas pregunta a lanta. Esey ta duna di conoce cu falta hopi mas investigacion y cu esaki lo por ta un trabou cu por tuma luga den cuadro di e estudio di Master di Papiamento na Universidad di Aruba.

Scroll To Top

Papiamento

Manual di Gramatica di Papiamento

Archivo

Tocante

Contacto

Menu