Papiamento como modulo den FAS na Universidad Aruba

15/08/2011

Publica: 15 di augustus 2011 100818

Oranjestad – Fundacion Lanta Papiamento ta informa cu gran placer y cu masha orguyo cu pa e aña academico nobo aki Universidad ta introduci Papiamento como materia den e curiculo di e estudionan “Social Work and Development” y “Organization, Governance and Management” na e Facultad di Arte y Ciencia (Faculty of Arts and Science-FAS).

Esaki ta un iniciativa di parti di Universidad cu Fundacion Lanta Papiamento ta aplaudi cu orguyo y cu sigur ta mustra e importancia cu Universidad ta duna Papiamento como idioma oficial y nacional di Aruba, como idioma materno di mayoria di e habitantenan di Aruba y como idioma di comunicacion den tur sector aki na Aruba. E exito di un profesional ta depende di su habilidad di comunica tanto na forma oral como na forma skirbi, particularmente den su idioma materno.

Esaki ta pues un fecha historico den historia di Papiamento na Aruba. Papiamento for di idioma di catibo a bira idioma oficial di Aruba y awor ta cana drenta Universidad di Aruba cara na halto como parti di curiculo oficial di un facultad. Papiamento, siendo un di e idiomanan oficial di Aruba, ainda ta bringa pa haya su luga den enseñansa. Awor cu Universidad a integra Papiamento den su curiculo, e scolnan secundario sigur lo mester tene na cuenta cu e materia Papiamento den futuro lo por bira un exigencia pa por drenta universidad of IPA y cu, pues, lo mester tin Papiamento den nan profielnan.

E grupo desaroyado di e materia aki a traha duro pa hinca un bon programa den otro cu ta cumpli cu e exigencianan di universidad en general y di e facultad y su estudionan en particular. Ta haci e studiantenan consciente di e balor di Papiamento den nos comunidad y tambe di su balor sociohistorico. Ta laga e studiantenan bira consciente tambe di e laso estrecho cu tin entre nos lenga Papiamento y nos cultura. Ademas, como cu – ora cu nan caba nan estudio – e studiantenan lo mester bay eherce nan profesion den e comunidad multietnico, multicultural y multilingual aki di nos, e studiantenan ta siña con pa anda cu hende di diferente rasa, diferente cultura y diferente lenga y e papel importantisimo cu idioma ta hunga den esey. Pa medio di investigacion y reflexion di idioma e studiantenan ta bira mas consciente di nan propio uzo di idioma y lo hisa nan nivel di uzo di idioma na un nivel mas academico.

E docente di e modulo aki lo ta Señora Swinda Schwengle, cu sosten di Ramon Todd Dandaré Mag. Ling. y drs. Joyce Pereira, kendenan ta forma parti di e grupo desaroyado di e estudio di Master den Lenga y Literatura Papiamento, cu ta plania pa cuminsa den un futuro no mucho lehano na Universidad di Aruba.

Papiamento poco poco ta haya su reconocemento, pasobra e consenshi ta crece cu ta iresponsabel, ilogico y inhusto pa neglisha y ignora e idioma materno di un ser humano den su desaroyo propio y den esun di su nacion. E idioma materno aki ta e esencia di su bida y e base di su desaroyo, e weso di lomba indiscutibel di su existencia. Experiencia y investigacion ta proba esaki cada biaha atrobe y cada biaha mas convincentemente.

Fundacion Lanta Papiamento ta felicita Universidad di Aruba cu e decision aki di incorpora Papiamento den e pakete di materia di su studiantenan di Facultad di Arte y Ciencia (FAS) y cu e iniciativa di organisa den un futuro proximo un estudio di Master den Lenga y Literatura Papiamento den e mesun facultad. Pabien Papiamento! Pabien Universidad! Pabien Aruba!

Scroll To Top

Papiamento

Papiamento como modulo den FAS na Universidad Aruba

Archivo

Tocante

Contacto

Menu