Literatura
Buki na Papiamento pa hoben
Proyecto Idioma di Departamento di Enseñansa Aruba (DEA) a publica diferente buki na Papiamento. Tin obra original, skirbi y ilustra pa nos talentoso autornan y ilustradonan local. Y tin traduccion tambe, tanto di obra Caribense como internacional.
E temanan den literatura ta varia: di desaroyo di identidad propio y con pa deal cu bida social como adolescente –cu tur su retonan bon y menos bon (Fiesta! Namoramento! Peer pressure!)– te cu situacion dificil na cas y problema social.
E bukinan informativo ta trata bida di figuranan historico real manera Cleopatra, Shakespeare y John Lennon y ta skirbi comosifuera e personahenan famoso aki mes ta conta nan storia.
Aki por lesa e storianan online: Buki pa hoben
Buki na Papiamento pa mucha
Den transcurso di tempo, Proyecto Idioma y Seccion Desaroyo di Curiculo di Departamento di Enseñansa Aruba (DEA) a publica hopi literatura pa mucha di scol preparatorio y scol basico. Tur e bukinan aki a bay scol y ta disponibel pa fia tambe na Biblioteca Nacional di Aruba. Awendia por papia di un coleccion amplio di buki di lesa pa mucha.
Djis pa haya un idea, e mucha por:
- Siña su prome palabranan cu Mi prome diccionario;
- Gosa di carnival cu E tumberito;
- Sigui e hazañanan di Dori cu Elmer y yora hunto cu Djente Chikitin;
- Siña tocante nos monedanan di Aruba den E kitrin di Florin;
- Lesa di Mingi e fruminga y di e bishita inespera di otro planeta den Jayden y e morocho Marciano.
Pa tur mucha, di chikito te grandi, tin buki pa lesa!
Tin serie di buki informativo tambe, pa por ehempel un spreekbeurt na scol, tocante:
- Bestia den Famia;
- Echonan interesante, manera di kico arco iris ta traha, den Mi kier sa!;
- Tor y haraña spantoso … y mucho mas, den Un bista.
Pocopoco nos ta pone mas buki akiriba. Keda pendiente!
Aki por lesa algun buki online: Buki pa mucha
Tambe por lesa e bukinan riba e Catalogo digital di material educativo di DEA: Catalogo > Buki di lesa
