Uzo di Papiamento

Aruba tin un idioma nacional y dos idioma oficial. Papiamento ta e idioma nacional y banda di Hulandes, Papiamento ta tambe e idioma oficial.

Papiamento y economia y comercio

Apesar cu Ingles ta un di e idiomanan principal den e sectornan aki, toch Papiamento ta keda un idioma di sosten pa progreso di e economia di Aruba y den comercio.

Papiamento y husticia

Nos leynan ta den idioma Hulandes y e casonan den corte te keda trata na Hulandes. Pero na momento cu p.e. un abogado Arubiano kier comunica e pueblo tocante un caso, e ta hacie na Papiamento. Otro ehempel ta cu ora un acusado of testigo tin cu duna cuenta den corte, hopi biaha e ta expresa na Papiamento.

Papiamento y religion

Religion tabata e prome area unda Papiamento a haya acogida. Nan tabata esnan prome cu a acerca e pueblo den Papiamento a traves di buki, scol, predicashi, cantica y mas. Te awe Papiamento ta keda e idioma cardinal den religion.

Papiamento y enseñansa

Prome cu e refineria Shell a yega Corsou, Papiamento tabata e lenga di instruccion den enseñansa na Aruba. Despues di varios decada, Papiamento a bolbe den scol. Actualmente Papiamento ta e idioma di sosten na momento di splica algo nobo. Papiamento ta como materia den enseñansa secundario y avansa (EPI). Papiamento ta tambe un materia di escogencia pa finalisacion di estudio secundario. Papiamento ta e lenga di instruccion den enseñansa special y preparatorio. Ademas tin un estudio di cuater aña di Bachelor Papiamento na IPA.

Papiamento y cultura

E idioma primordial pa cultura di Aruba ta keda Papiamento. Ora cu kier expresa un sentimento of kier duna un opinion of simplemente kier comunica un mensahe pa medio di canto of poesia, anto e idioma mas uza ta Papiamento.

Papiamento y gobierno

Papiamento ta presente den reunion y debatenan den parlamento. Tambe ora cu gobierno tin su rueda di prensa of kier comunica cu pueblo tocante nan trabounan, nan ta hacie den idioma Papiamento.

Papiamento y medio di comunicacion

Den e medionan di comunicacion aki na Aruba, Papiamento ta hunga un papel esencial. E corantnan, ATV, Tele Aruba y radionan ta comunica cu e pueblo di Aruba mayoria biaha na Papiamento.

Scroll To Top