Material di referencia
Lista di palabra
Aki por download un lista di palabra cu ta deriva di e “Vocabulario Ortografico di Papiamento” (buki blauw). E palabranan ta skirbi segun e reglanan stipula den ley di ortografia di Papiamento aproba pa Parlamento di Aruba dia prome di november 2018.
Aplicacion pa busca palabra
E aplicacion “Busca palabra” ta deriva di e lista di palabra skirbi segun e reglanan stipula den “Ortografia di Papiamento – version april 2009” y publica den e “Vocabulario Ortografico di Papiamento” (buki blauw). Aki por haci uzo di e aplicacion pa busca con pa skirbi un palabra na Papiamento den e ortografia di Aruba:
Manual di Gramatica di Papiamento – Morfologia
E trabou aki ta resultado di un proceso di varios aña. Primeramente a desaroya e categorianan di Preposicion y Interheccion, debi cu tabatin poco literatura tocante esakinan na Papiamento. E elaboracion di e dos categorianan aki tabata un trabou preliminar pa un gramatica basico completo. Ta existi algun trabou caba riba e tereno aki, pero esakinan no ta actualisa of nan ta enfoca riba algun aspecto so di gramatica. E obra aki ta trata tur e categorianan di palabra, basa riba e resultadonan di investigacion di Papiamento actual cu e comision a realisa. Cu e meta ey na bista e comision a consulta fructiferamente e obranan cu ta aparece den e bibliografia.
Intencion di e manual aki ta pa e lesado adkiri conocemento basico di gramatica di Papiamento. E buki aki ta trata principalmente categoria di palabra. Di e manera aki e lesado por perfecciona su conocemento di e idioma cu e ta uza como vehiculo di comunicacion. Na un manera eficiente y lihe e lesado por conoce e reglanan di e idioma y por soluciona duda specifico tocante uzo corecto di Papiamento. Pa e motibo ey a trata e categorianan na un manera accesibel y a evita uza un idioma hopi tecnico. E manual aki ta dirigi no solamente na maestro, sino tambe na studiante, na profesional di diferente disciplina y generalmente na cualkier persona interesa pa haya un bon conocemento di gramatica di Papiamento.
Aki por lesa:
Gramatica – Preposicion y Interheccion
E texto den e publicacion aki a wordo skirbi prome cu publicacion di e buki “Manual di gramatica di Papiamento – Morfologia” (Departamento di Enseñansa 2010), den cual tambe ta trata e categorianan gramatical preposicion y interheccion. Sinembargo, mirando cu e trabou den e publicacion aki ta uno mas amplio cu den e manual menciona, Departamento di Enseñansa a dicidi di publica e trabou aki asina mes, pa brinda tur usuario e posibilidad di uza esaki como material di referencia adicional.
A laga e texto original manera cu e tabata, cu excepcion di algun adaptacion ortografico necesario y algun otro cambio chikito di redaccion. Nos ta spera cu e trabou aki por contribui na trece mas claridad y menos confusion ora di uza preposicion y interheccion na Papiamento.
Aki por lesa:
Gramatica – Sintaxis
Den Introduccion di e prome tomo di e obra aki a duna un splicacion somero di Linguistica y Gramatica como ciencia, y di e partinan fundamental di Gramatica, esta Morfologia y Sintaxis. E prome tomo a trata categoria di palabra, cu ta cay bou di Morfologia di Papiamento. Den e di dos tomo aki ta trata Sintaxis di Papiamento, esta con ta hinca frase den otro den Papiamento. Pues, e ta elabora e aspectonan relaciona cu structura di frase, basa riba resultado di e investigacionnan di Papiamento actual cu e autornan a realisa. Cu e meta ey na bista e autornan a consulta parcial of totalmente e obranan cu ta aparece den e bibliografia.
Intencion di e manual aki ta pa e lesado adkiri conocemento basico di gramatica di Papiamento. E buki aki ta trata principalmente frase y nan structura. Di e manera aki e lesado por perfecciona su conocemento di e idioma cu e ta uza, entre otro, como vehiculo di comunicacion. E lesado por amplia su conocemento di e reglanan di e idioma y por soluciona duda specifico cu e por tin tocante uzo corecto di Papiamento. Pa e motibo ey e autornan a purba describi e elementonan di Sintaxis na un manera accesibel y a evita lo mas posibel di uza un idioma hopi tecnico.
E manual aki ta dirigi no solamente na maestro, sino tambe na studiante, na profesional di diferente disciplina y generalmente na cualkier persona interesa pa haya un bon conocemento di gramatica di Papiamento.
Aki por lesa:
Lista di diccionario
Aki por download:
Scroll To Top
